Góð byrjun Skallagríms ekki nóg gegn Stjörnunni

February 23, 2017

Stjarnan rétt knúði fram sigur á Skallagrím í 19. umferð Dominos deildar karla. Skallagrímur átti algjörlega ótrúlega byrjun í leiknum en Stjarnan kom til baka og vann að lokum 83-80 sigur.

Umfjöllun um helstu þætti leiksins má finna hér að neðan:

Gangur leiksins.

Borgnesingar mættu heldur betur til leiks bæði innan vallar og í stúkunni. Skallagrímur komst strax í 2-12 forystu og það var líkt og tap Stjörnunnar á Tindastól í byrjun viku sæti enn í þeim því menn voru hreinlega ekki tilbúnir í baráttu og læti. Magnús Þór Gunnarsson setti fyrstu þrjú þrigga stiga skotin sín í leiknum og var sjóðandi heitur. Varnarleikur Skallagríms fylgdi með en liðið þvingaði Stjörnuna í mjög erfið skot og gaf þeim ekkert undir körfunni. Munurinn varð mestur 28-10 fyrir Skallagrím en þriggja stiga karfa Tómasar Þórðar minnkaði muninn í 15 stig og var staðan eftir ótrúlegan fyrsta leikhluta 15-30.

Bekkur Stjörnunnar setti 16 stig í öðrum leikhluta þar sem þeir Arnþór, Ágúst og Eysteinn fóru fyrir sínum mönnum. Stjarnan hafði skyndilega náð Skallagrím með góðu áhlaupi og liðin skiptust á að hafa forystuna fyrir hálfleik og endaði hann 44-45 Skallagrím í vil.

Sama var uppá tengingnum í seinni hálfleik. Bæði lið náðu nokkrum áhlaupum en þess fyrir utan var munurinn ávalt lítill og ljóst að leikurinn myndi ráðast á því hvorum megin stemmningin myndi lenda að lokum. Það gekk eftir enda réðst leikurinn á stórum skotum og nokkrum sentímetrum að lokum.

Þegar ein mínúta var eftir var staðan 78-77 og Stjarnan átti boltann. Í þeirri sókn varði Bjarni Guðmann Jónsson sniðskot Marvins Valdimarssonar á magnaðan hátt og Skallagrímur gat tekið forystuna. Það hafðist ekki en hinu megin setti Tómas Heiðar risastóra þriggja stiga körfu. Magnús Þór var ekki hættur og svaraði í sömu mynt en með mann í andlitinu. Skallagrímur braut og sendi Marvin á línuna sem setti bæði skotin sín að sjálfsögðu. Staðan 83-80 þegar níu sekúndur voru eftir, það var að sjálfsögðu MG10 sem átti lokaskotið og munaði nokkrum millimetrum að boltinn rataði ofan í úr ævintýralegu skoti. Þar við sat og Stjarnan hafði tvö stig úr æsilegum leik gegn liðinu í 10 sæti sem sýnir enn og aftur hversu mögnuð Dominos deildin er þessi misserin.

Hetjan

Marvin Valdimarsson steig heldur betur upp í kvöld. Hann endaði með 22 stig og hittu úr fimm af sex þriggja stiga skotum sínum og öll risa stór. Þrennuvaktin var einungis tveim stigum frá útkalli í kvöld en Hlynur Bæringsson endaði með 8 stig, 11 fráköst og 10 stoðsendingar í kvöld. Helst munaði þó um gott framlag af bekk Stjörnunnar í kvöld.

Hjá Skallagrím var Flenard Whitfield frábær að vanda með 27 stig, 10 fráköst og 10 fiskaðar villur. Vert er að nefna framlag Bjarna Guðmanns Jónssonar í dag. Hann kom inní byrjunarlið Skallagríms og þrátt fyrir að hann skili ekki miklu á tölfræði skýrslunni þá var varnarleikur hans og barátta til hreinnar fyrirmyndar en hann gerði leikmönnum Stjörnunnar ítrekað erfitt fyrir undir körfunni. Auk þess á Magnús Þór hrós skilið fyrir flottan leik en það sást langar leiðir á honum að hann ætlaði ekki að tapa þessum leik.

Kjarninn

Skallagrímsmenn geta verið stoltir af frammistöðu sinni í dag. Að því sögðu þá mega þeir alveg vera súrir með að hafa glutrað leiknum frá sér eftir frábæra byrjun. Liðið hitti ekki skotum í lokin til að koma sér í góða stöðu og töpuðu klaufalegum boltum. Ljóst er að menn eiga einbeita sér að leiknum og spila fyrir hvorn annan. Frammistaðan í kvöld var fyrir liðið og lögðu allir eitthvað í púkk. Ef liðið nær að halda ákefðinni og greddunni sem það sýndi í kvöld í næstu leikjum er engum blöðum um það að fletta að Skallagrímur mun vinna fleiri leiki á þessu tímabili.

Þrátt fyrir dapra byrjun Stjörnunnar í leiknum þá sýndi liðið loksins þá hugrekki og vilja til að vinna leikinn sem því vantaði í síðasta leik. Sóknarleikurinn varð þolinmóðari og skynsamari, fyrir vikið opnuðust réttu mennirnir og yfirvegunin varð meiri í öllum aðgerðum. Með sigrinum jafnaði Stjarnan KR og Tindastól að stigum en sitja enn í þriðja sæti vegna innbyrgðis viðureigna. Anthony Odunsi átti sérlega dapran dag og ljóst að garðbæingar verða að fá meira frá honum ef liðið ætlar sér í alvöru að keppa við hin efstu liðin.