Undir 20 ára karlalið Íslands lagði Finnland rétt í þessu í undanúrslitaleik Evrópumótsins í Georgíu, 94-77. Ísland er því komið í úrslitaleikinn gegn Serbíu sem fram fer á morgun kl. 17:15, en Serbía lagði Eistland nokkuð örugglega fyrr í dag í hinum undanúrslitaleiknum.
Ísland er einnig öruggt með fyrsta eða annað sæti mótsins þetta árið og því komnir með þátttökurétt í deild þeirra bestu á næsta ári, en efstu þrjú lið mótsins fara upp í A deildina.
Atkvæðamestur fyrir Ísland í leiknum var Orri Gunnarsson með 27 stig, 5 fráköst og 2 stoðsendingar. Honum næstur var Sigurður Pétursson með 14 stig, 4 fráköst og 5 stolna bolta.
Úrslitaleikur Íslands gegn Serbíu er kl. 17:15 að íslenskum tíma á morgun og verður í beinni vefútsendingu.
