Kristrún Sigurjónsdóttir mátti láta sér það nægja að fylgjast með viðureign Grindavíkur og Hamars af tréverkinu í gærkvöldi en samkvæmt læknisráði átti hún að hvíla. Sem betur fer fyrir Hamar kom fjarvera Kristrúnar ekki að sök því Hamarskonur höfðu baráttusigur gegn Grindavík 58-63.
,,Ég hef verið að drepast í bakinu í allt haust og er ekki að ná mér eins og ég vildi þannig að ég hvíldi í gær samkvæmt læknisráði,“ sagði Kristrún sem gert hefur 13,5 stig að meðaltali í leik með Hamar það sem af er leiktíðinni.
,,Vonandi verð ég með í næsta leik en það kemur bara í ljós því það verður bara tekin ein vika í einu,“ sagði Kristrún sem er á meðal sterkustu leikmanna deildarinnar og ljóst að Hamarskonur geta ekki lengi án hennar verið.
