Ísland tapaði fyrir Belgíu í dag í öðrum leik sínum á lokamóti EuroBasket í Katowice í Póllandi, 64-71.
Ísland því enn án sigurs eftir fyrstu tvo leiki lokamótsins þetta árið.
Hér fyrir neðan eru einkunnir leikmanna Íslands úr leik dagsins.
Martin Hermannsson – 6
Flottur í fyrri hálfleik en í vandræðum í seinni hálfleik með villur og komst ekki í takt við leikinn. Átti erfitt uppdráttar þegar liðið þurfti körfur í lokin.
Tryggvi Snær Hlinason – 9 – Maður leiksins
Langbesti leikmaður liðsins í leiknum. Spilaði 39 mínútur, skoraði 20 stig og tók 10 fráköst. Flottur á báðum endum en dró úr honum í lokin. Eðlilega.
Elvar Már Friðriksson – 7
Var í vandræðum varnarlega í lokin en átti heilt yfir ágætis leik þrátt fyrir að skotnýtingin hafi ekki verið góð. Nokkrar vondar ákvarðanir í lokin.
Jón Axel Guðmundsson – 6
Komst aldrei í takt við leikinn en gaf sig allan í þetta eins og alltaf.
Hilmar Smári Henningsson – 7
Hefði viljað sjá hann spila meira. En Hilmar kom inn í byrjunarliðið og átti fína spretti. Ekkert sérstaklega uppá hann að klaga.
Kristinn Pálsson – 7
Byrjaði leikinn og byrjaði hann af nokkrum krafti. Átti tvær af þremur þriggja stiga körfum Íslands í leiknum en hvarf undir lokin eins og aðrir.
Ægir Þór Steinarsson – 6
Strögglaði í þessum leik. Gaf liðinu minna varnarlega en oft áður og sóknin var alls ekki til staðar.
Styrmir Snær Þrastarson – 7
Ágætis orka í Styrmi eins og alltaf en kannski breytti ekki miklu.
Kári Jónsson – Spilaði ekki nóg
Almar Orri Atlason – Spilaði ekki nóg
Orri Gunnarsson – Spilaði ekki nóg
Sigtryggur Arnar Björnsson – Spilaði ekki nóg
