Íslenska karlalandsliðið lagði Litháen í Laugardalshöllinni í kvöld í þriðja leik sínum í undankeppni HM 2027, 86-85.
Að þessari viðureign lokinni halda bæði lið til Litháen. Þar mætast þau að nýju í seinni leik þessa landsleikjaglugga mánudaginn 2. mars.
Hér fyrir neðan má sjá einkunnir leikmanna Íslands fyrir frammistöðuna í kvöld:
- Elvar Már Friðriksson – 10 (Maður leiksins) Elvar var besti maður vallarins og sennilega besti leikmaður Evrópu í fjórða leikhluta. Hann tók leikinn algjörlega yfir, skoraði síðustu átta stig Íslands og tryggði sigurinn nánast upp á eigin spýtur. Orð eru óþörf – ef hægt væri að gefa 11 í einkunn, þá væri það gert hér.
- Tryggvi Snær Hlinason – 9 Risinn á miðjunni batt vörnina saman og gaf tóninn strax í upphafi með tveimur glæsilegum vörðum skotum. Hann minnti rækilega á sig sóknarlega og var akkerið sem liðið þurfti á að halda.
- Hilmar Henningsson – 9 Gerði nákvæmlega það sem til var ætlast: Kom inn af bekknum með gríðarlega orku, setti stór skot og sótti af hörku á körfuna. Að mati undirritaðs spilaði hann of lítið framan af, en hann steig svo sannarlega upp á ögurstundu.
- Ólafur Ólafsson – 9 Hvað er hægt að segja um Ólaf? Hann mætir inn, neglir niður þristum, hrindir mönnum og kastar sér á hvern einasta lausa bolta. Það var mál manna í stúkunni að hver karfa frá Óla væri einhvern veginn dýrmætari en aðrar.
- Þórir Guðmundur Þorbjarnarson – 9 Algjörlega frábær innkoma hjá Þóri. Eftir að hafa hikað aðeins við fyrsta skotið spilaði hann eins og reyndasti maður í heimi. Frammistaða sem verður að segja „bravó“ við.
- Kristinn Pálsson – 8 Kristinn var einn af þeim sem hélt Íslandi á floti sóknarlega í fyrri hálfleik. Hann skilaði sínu vinnuframlagi um allan völl og var óhræddur við að taka af skarið þegar aðrir virtu vera með smá skrekk í sér.
- Ægir Þór Steinarsson – 7 Fínn leikur hjá Ægi. Hann bar kannski ekki mikið á sér sóknarlega en fann Elvar á réttum stöðum og stýrði leiknum af skynsemi svo aðrir gætu hvílt sig. Spilaði fína vörn eins og honum er einum lagið.
- Jón Axel Guðmundsson – 7 Eins og svo oft áður þurfti Jón Axel að taka á sig mikla varnarbyrði gegn stærri mönnum. Hann var fyrirmynd innan vallar og kastaði sér á alla lausa bolta. Sóknarlega vantaði eitthvað upp á, en eftir svona sigur er manni nákvæmlega sama um það.
- Styrmir Snær Þrastarson – 7 Náði sér ekki alveg á strik í takt við leikinn en var mikilvægur hlekkur í þeirri línunni sem hóf endurkomuna miklu.
Aðrir leikmenn:
- Haukur Helgi Pálsson: Spilaði ekki nóg (vegna meiðsla).
- Veigar Páll Alexandersson: Spilaði ekki nóg.
- Kári Jónsson: Spilaði ekki nóg.
