Dominos deild kvenna fer aftur af stað í kvöld eftir örlítið hlé vegna úrslitaleikja bikarkeppninnar um síðustu helgi. Fjögur lið fengu algjöra pásu á meðan Skallagrímur, Snæfell, Haukar og bikarmeistarar Keflavíkur léku til undanúrslita í Maltbikarnum.
Stórleikur umferðarinnar er þegar nýkrýndir bikarmeistarar Keflavíkur mæta íslandsmeisturum Snæfells. Snæfell hefur unnið báða leiki þessara liða í deildinni og eina liðið sem Keflavík hefur ekki unnið í vetur. Snæfell vill sjálfsagt koma til baka eftir tapið í undanúrslitum bikarkeppninnar síðasta miðvikudag og fróðlegt verður að sjá hvernig Keflavík mætir til leiks eftir verðskuldaða velgengni síðustu helgar.
Skallagrímur sem hefur unnið níu leiki í röð í deildinni fær Val í heimsókn en valsarar hafa verið að ná meiri takti í sínum leik að undanförnu. Grindavík fær Stjörnuna í heimsókn en Grindavík situr enn á botni deildarinnar en Stjarnan í fjórða sæti.
Haukar sem unnu bikarmeistaratitil í unglingaflokki mæta svo Carmen Tyson-Thomas og Njarðvík sem var ekki að ganga vel síðustu vikur fyrir bikarleikjapásuna.
Leikir dagsins
Grindavik-Stjarnan kl 19:15
Keflavik-Snæfell kl 19:15 (í beinni á Stöð 2 Sport)
Skallagrimur-Valur kl 19.15
Haukar-Njarðvík kl 19:15 (í beinni á Haukar Tv)
