22:02
{mosimage}
(Ingibjörg Jakobsdóttir var stigahæst hjá íslenska liðinu í dag)
Íslenska U 18 ára landslið kvenna mátti sætta sig við 46-67 ósigur gegn Dönum í sínum fyrsta leik á Norðurlandamótinu sem fram fer í Solna í Svíþjóð. Íslenska liðið leiddi 34-31 í hálfleik en gáfu eftir í þeim síðari og Danir lönduðu góðum sigri. Ingibjörg Jakobsdóttir var stigahæst í íslenska liðinu með 13 stig. Svíar hér ytra skráðu Rögnu Margréti Brynjarsdóttur frá Haukum með 4 fráköst en tölfræðingurinn og íþróttafréttamaðurinn Óskar Ófeigur Jónsson er staddur hér í Svíþjóð og skráði tölfræði leksins. Hann var með 20 fráköst skráð á Rögnu Margréti svo við tökum tölfræðinni frá heimamönnum með risavöxnum fyrirvara. Ítarlegri og betri tölfræði frá Norðurlandamótinu verður að fá að móti loknu.
Danir leiddu 15-20 að loknum fyrsta leikhluta en íslensku stelpurnar léku frábæran bolta í öðrum leikhluta. Ragna Margrét jafnaði metin í 24-24 með erfiðu teigskoti og við það vaknaði íslenska liðið og tók forystuna og leiddu 34-31 í hálfleik.
Í síðari hálfleik fór allt í baklás og Danir lokuðu í vörninni. Íslenska liðið var ekki að finna taktinn í sókninni og gerðu stelpurnar aðeins 5 stig í þriðja leikhluta og því leiddu Danir 39-48 fyrir fjórða og síðasta leikhluta.
{mosimage}
Rétt eins og í þriðja leikhluta gekk illa að skora hjá íslenska liðinu og því lönduðu Danir öruggum 46-67 sigri.
Stigaskor íslenska liðsins
Ingibjörg Jakobsdóttir 13
Hafrún Hálfdánardóttir 12
Ragna Margrét Brynjarsdóttir 11
Íris Sverrisdóttir 7
Kristín Fjóla Reynisdóttir 2
Heiðrún Hödd Jónsdóttir 1
{mosimage}