Tveir leikir fóru fram í NBA deildinni í nótt þar sem LA Clippers unnu sinn annan deildarleik í röð. Atlanta Hawks höfðu svo öruggan sigur á Washington Wizards 116-96. Eric Gordon og Blake Griffin voru að vanda fyrirferðamestir í liði Clippers í nótt. Gordon stigahæstur með 28 stig og 6 stoðsendingar en Griffin með 25 stig og 15 fráköst í 100-82 sigri Clippers gegn Sacramento Kings. Hjá Kings var Carl Landry með 18 stig.
Joe Johnson var stigahæstur hjá Atlanta í 116-96 sigri gegn Washington Wizards. Johnson gerði 21 stig í liði Hawks og Josh Smith bætti við 20 stigum og 14 fráköst. Gilbert ,,Agent Zero” Arenas var stigahæstur hjá Wizards með 21 stig og 8 stoðsendingar og nýliðinn John Wall hafði hægt um sig með 10 stig og 7 stoðsendingar.
Ljósmynd/ Griffin var með myndarlega tvennu hjá Clippers í nótt.
