Bucks engin fyrirstaða fyrir meistarana

Fjórir leikir fóru fram í NBA deildinni í nótt. Meistarar Miami Heat höfðu öruggan sigur á Milwaukee Bucks 118-95 í American Airlines Arena. LeBron James komst í eftirsóknarverðan klúbb í nótt þar sem hann hefur nú gert 10 stig eða meira í meira en 500 leikjum í röð. Hann er aðeins fimmti leikmaðurinn í sögu NBA til þess að ná þessum áfanga.

 

 

James lauk leik með 33 stig, 3 fráköst og 2 stoðsendingar en John Henson var atkvæðamestur í liði gestanna með 18 stig.

 

Þá komst Þjóðverjinn Dirk Nowitzki í sigri Dallas gegn Washington upp fyrir Jerry West á lista stigahæstu leikmanna í sögu NBA en Nowitzki gerði 19 stig í leiknum í nótt. Nowitzki færðist upp í 16. sæti listans og hefur nú gert 25.197 stig í deildinni og er byrjaður að naga í Reggie Miller fyrrum leikmann Indiana Pacers sem lauk ferli sínum með 25.279 stig. Ekki ósennilegt að Nowitski klári Miller áður en þetta tímabil er úti.