Haukur Helgi Pálsson og liðsfélagar í LEB Gold liðinu Breogan höfðu öruggan sigur um helgina. Íslenskt körfuknattleiksfólk lét að sér kveða hér og hvar um heiminn og stiklum við á því helsta frá helginni hér að neðan.
LEB Gold deildin á Spáni
Breogan 89-68 Ourense
Haukur Helgi Pálsson var í byrjunarliði Breogan og gerði 4 stig í þessum stórsigri. Hann lék í 16 mínútur og tók einnig 1 frákast og gaf 2 stoðsendingar. Breogan er í 6. sæti LEB Gold deildarinnar með 12 sigra og 7 tapleiki.
EBA deildin á Spáni
Eurocolegio Casavi 76-93 Albacete
Arnþór Freyr Guðmundsson lék í rúmar sjö mínútur með Albacete og gerði eitt stig af vítalínunni. Hann var einnig með eitt frákast og eina stoðsendingu í leiknum. Albacete er nú í 3. sæti í sínum riðli í EBA deildinni.
Danska úrvalsdeildin
Bakken Bears 108-88 Værlöse
Axel Kárason gerði 5 stig og tók 4 fráköst í liði Værlöse en Axel hefur verið með 7,9 stig að meðaltali í leik fyrir Værlöse þetta tímabilið. Værlöse er á botni dönsku deildarinnar með 4 sigra og 18 tapleiki
Háskólaboltinn í Bandaríkjunum
Catawba 47-44 Coker
Heiðrún Kristmundsdóttir var í byrjunarliði Coker og lék í 14 mínútur í leiknum en tókst ekki að skora. Hún var þó með eina stoðsendingu og einn stolinn bolta.
Háskólaboltinn í Kanada
Crandall 82-83 Saint Vincent
Sigtryggur Arnar Björnsson var stigahæstur í liði Saint Vincent með 26 stig, 13 fráköst og 5 stolna bolta. Saint Vincent hefur nú unnið 15 leiki og tapað fjórum í kanadíska háskólaboltanum.
