Mikil körfuboltastemming er í Borgarnesi þessa dagana, svo mikil að uppselt hefur verið á einhverja leiki nú í byrjun tímabils þar, en bæði kvenna og karlalið Skallagríms fóru upp um deild í sumar og leika nú með þeim bestu. Sökum þessa mikla áhuga sem nú er á svæðinu hefur félagið sett í loftið glæsilega nýja heimasíðu, sem á að þjóna iðkendum og stuðningsmönnum betur.
Aðeins rúmir sex klukkutímar eru í næsta heimaleik karlaliðs Skallagríms, en þá mæta þeir Íslands og bikarmeisturum KR kl. 19:15 í kvöld í Fjósinu.
