Benedikt Guðmundsson hefur hætt störfum hjá uppeldisfélagi sínu, KR, þar sem hann hefur unnið frábært starf síðustu árin. Þetta kemur fram í Fréttablaðinu í dag og á www.visir.is
Benedikt gerði karlalið félagsins að meisturum fyrir ári og lék svo sama leik með kvennalið félagsins í ár.
„Ég starfa ekki fyrir KR á næsta ári hið minnsta. Við skildum í góðu og það eru engin leiðindi í kringum mína brottför," segir Benedikt.
„Ég vildi vera með kvennaliðið áfram en það er niðurskurður hjá félaginu og ég hefði þurft að taka á mig mikla launalækkun til þess að halda því starfi áfram. Ég þarf að sjá fyrir fjölskyldu og gat því ekki tekið því sem var í boði. Ég skil samt KR vel og því eru engin illindi í þessu," segir Benedikt en hann gerir einnig ráð fyrir að láta af störfum sem íþróttafulltrúi KR.
