Þá er ljóst hvaða lið munu berjast um Ólympíugullið í London en það verða Bandaríkin og Spánverjar þar sem Bandaríkjamenn voru rétt í þessu að kjöldraga Argentínumenn 109-83. Hreinlega allt steinlá ofaní hjá Bandaríkjamönnum í síðari hálfleik og þefurinn af uppgjöf í herbúðum Argentínu fannst alla leið yfir Atlantshafið og heim í stofu hér á Íslandi.
Kevin Durant var stigahæstur í liði Bandaríkjanna með 19 stig en þeir LeBron James og Carmelo Anthony bættu báðir við 18 stigum. James sem fyrr daðraði við þrennuna þar sem hann bætti við 7 fráköstum og 7 stoðsendingum. Hjá Argentínumönnum var Manu Ginobili með 18 stig og þeir Luis Scola og Carlos Delfino bættu báðir við 15 stigum.
Úrslitaleikurinn fer fram á sunnudag kl. 15:00 að staðartíma eða kl. 14:00 að íslenskum tíma.
Mynd/ LeBron James daðraði við þrennuna í stórsigri Bandaríkjanna gegn Argentínu í kvöld.
