Tveir af efnilegustu leikmönnum Ármanns hafa framlengt samninga sína við félagið til næstu tveggja ára og munu leika með meistaraflokki kvenna í efstu deild á komandi keppnistímabili. Þetta eru þær Brynja Benediktsdóttir og Rakel Sif Grétarsdóttir, sem báðar eru fæddar árið 2009, en þær hafa leikið með félaginu í mörg ár og þegar stigið sín fyrstu skref með meistaraflokki.
Miklar væntingar eru bundnar við áframhaldandi vöxt þeirra hjá uppeldisfélaginu, en Brynja var auk þess valin í U18 ára landslið Íslands fyrir verkefni sumarsins. Forráðamenn Ármanns lýsa yfir miklu stolti með árangur hennar og boða jafnframt fleiri fréttir af leikmannamálum meistaraflokka á næstu dögum.
