Íslenska U 18 ára liðið er komið með bakið upp við vegg á Norðurlandamótinu í Svíþjóð eftir tvo tapleiki í röð. Ísland var rétt í þessu að bíða 77-67 ósigur gegn heimamönnum frá Svíþjóð og nú dugir ekkert annað en sigur í síðustu tveimur leikjunum ef Ísland ætlar sér að spila um eitt af verðlaunasætunum. Oddur Ólafsson var eini maður liðsins sem lék af eðlilegri getu í dag en Oddur setti 23 stig í leiknum á meðan aðrir voru töluvert fjarri sínu besta.
Heimamenn í Svíþjóð komust í 4-0 áður en Haukur Helgi Pálsson kom Íslendingum á blað. Reyndar gerði Ísland næstu fimm stig leiksins en fremur rólegt var yfir upphafsleikhlutanum. Svíar komust í 19-9 þar sem Íslendingar áttu í basli með að sækja í teig heimamanna. Ísland beit aðeins frá sér undir lok fyrsta leikhluta þar sem Oddur Ólafsson smellti niður þrist á síðustu sekúndunum en Svíar höfðu yfir 19-13.
Haukur Helgi Pálsson minnkaði muninn í 19-16 er hann skoraði í teignum og fékk villu að auki í byrjun annars leikhluta. Ísland notaðist við svæðisvörn og var refsað fyrir vikið, heimamenn settu hvern þristinn á fætur öðrum og komust í 32-22. Íslendingar skiptu þá yfir í maður á mann vörn og Oddur Ólafsson ætlaði ekki að láta labba yfir sig og fór fyrir sínum mönnum.
Oddur minnkaði muninn í 32-28 með þriggja stiga körfu en heimamenn áttu lokaorðið með stökkskoti í teignum um leið og lokaflautan gall og leiddu Svíar 39-34 í hálfleik þar sem Oddur var atkvæðamestur í íslenska liðinu með 12 stig og 4 fráköst.
Þriðji leikhluti er 10 mínútur sem íslensku piltarnir fá ekki aftur og vilja örugglega ekki aftur. Svíar byrjuðu 13-0 og komust í 52-36 gegn andlausum Íslendingum. Oddur Ólafsson náði að minnka muninn í 52-39 með þriggja stiga körfu en þessi þrjú stig voru þau fyrstu hjá Íslandi eftir 6 mínútna leik í þriðja leikhluta.
Heimamenn í Svíþjóð unnu þriðja leikhluta 21-9 og voru einfaldlega sterkari á öllum sviðum og staðan 60-43 fyrir fjórða og síðasta leikhluta.
Oddur Birnir Pétursson hristi slenið af íslenska hópnum í upphafi fjórða leikhluta með körfu og villu að auki og Ísland hélt Svíþjóð stigalausum í tvær og hálfa mínútu. Á þeim kafla náðu piltarnir ekki að bíta nægilega frá sér í sókninni. Illugi Auðunsson hrökk þó í gang á stuttum kafla og lét finna sig nokkrum sinnum í teignum, Ísland minnkaði muninn í 62-54 en nær komust piltarnir ekki.
Svíar voru iðnir við að finna göt á íslensku vörninni og unnu að lokum nokkuð öruggan 77-67 sigur. Óhætt er að segja að íslenska liðið hafi ekki átt sinn besta dag en nú eru tveir leikir eftir sem verð að vinnast ætli liðið sér að ná að spila um sæti á mótinu.
Oddur Ólafsson var langbesti maður íslenska liðsins með 23 stig og 6 fráköst en aðrir leikmenn voru nokkuð frá sínu besta. Illugi Auðunsson gerði 10 stig í leiknum og Haukur Helgi Pálsson bætti við 9 stigum.
Ljósmynd/ [email protected] – Oddur Ólafsson var eini Íslendingurinn í U 18 ára liðinu með lífsmarki í dag.
