09:00
{mosimage}
(Petrúnella Skúladóttir leiddi Grindavík áfram í gærkvöldi)
Grindvíkingum tókst í gærkvöldi að koma fram hefndum gegn nýliðum Snæfells sem fyrir leikinn í gær höfðu í tvígang skellt bikarmeisturum Grindavíkur. Liðin mættust í fyrstu umferð B-riðils í Iceland Express deild kvenna í gær og urðu lokatölur 78-59 Grindavík í vil. Petrúnella Skúladóttir fór mikinn í liði Grindavík og gerði 24 stig en hjá Snæfell var Kristen Green einnig með 24 stig og tók auk þess 14 fráköst.
Með sterkri vörn í upphafi leiks komst Grindavík í 7-0 og leiddu gular síðarn 21-10 að loknum fyrsta leikhluta. Í öðrum leikhluta komust gestirnir nær Grindavík og náðu að minnka muninn í 23-21. Grindavík náði þó að auka muninn í 42-35 og þannig stóðu leikar í hálfleik.
Í þriðja leikhluta náðu Grindavíkingar allt að 23 stiga mun og við það virtist allt sjálfstraust úr leik gestanna. Staðan að loknum þriðja leikhluta var 59-39 fyrir Grindavík og eftirleikurinn auðveldur. Lokatölur urðu svo 78-59 og langþráður sigur í höfn hjá Grindavík og óhætt að segja að nýliðar Snæfells hafi gert gulum mikla skráveifu í deildinni þetta árið.
Ingibjörg Jakobsdóttir lék ekki með Grindavík í gær sökum meiðsla aftan í læri en vonast er til þess að hún verið komin á ról sem allra fyrst.
Eftir sigurinn í gær er Grindavík í 2. sæti B-riðils með 10 stig en Valskonur eru í toppsætinu með 16 stig eftir auðveldan sigur á Fjölni í gær en Valur lék án þeirra Lovísu Guðmundsdóttur og Signýjar Hermannsdóttur.
Tölfræði leiksins:
http://server4.mbt.lt/prod/kki/index.php/b19sYW5nPWhlJm9fc2Vhcz0yMSZvX2xlYWc9MSZmdXNlYWN0aW9uPWdhbWVzLm1haW4mZ19pZD00NjM=
Alma Rut Garðarsdóttir
Mynd: [email protected]
