09:21:05
NY Knicks hafa verið góðir heim að sækja í síðustu tveimur leikjum, en LeBron James fylgdi 61 stigs frammistöðu Kobe Bryants eftir með því að skella 52 stigum á þá og bætti við 11 fráköstum og 10 stoðsendingum í sigri í nótt. Þetta var í annað skiptið sem James fer yfir 50 stigin í Madison Square Garden en það hefur enginn annar gert fyrir utan Michael nokkurn Jordan sem glöggir lesendur ættu að muna eftir. Þá var þetta í fyrsta sinn sem nokkur leikmaður nær þrefaldri tvennu með 50 stigum frá því að Kareem Abdul-Jabbar gerði það árið 1975.
Nánar um leiki næturinnar hér að neðan…
James hóf leikinn með miklum látum og skoraði 20 stig strax í fyrsta leikhluta en Knicks héldu sér inni í leiknum fram til leiksloka. Víst er að margir eru farnir að horfa til sunnudagskvölds þegar Kobe og félagar, sem unnu Toronto í nótt, mæta til Cleveland. Ef einhver hefur verið í vafa um að þarna séu tveir bestu leikmenn deildarinnar ættu síðustu leikir að taka af öll tvímæli.
(ath. 2 dögum síðar var ein stoðsending tekin af JAmes þannig að þrennan var slegin út)
Meðal annarra úrslita í nótt má geta þess að Orlando vann sinn fyrsta leik eftir að hafa misst stjörnuleikmanninn Jameer Nelson í meiðsli. Þeir unnu sigur á Clippers sem hafa verið afar gjafmildir í vetur og eru að vísu í hræðilegu meiðslahallæri.
Annað lið sem er án leikstjórnanda er New Orleans Hornets sem lágu fyrir Chicago, en þeir síðarnefndu hafa aldeilis girt sig í brók að undanförnu eftir hræðilega byrjun á tímabilinu.
Þá unnu Memphis Grizzlies sinn annan sigur í röð eftir 12 leikja taphrinu. Nýliðinn OJ Mayo var sem fyrr allt í öllu hjá Grizzlies og gerði 32 stig.
Úrslit næturinnar:
LA Lakers 115
Toronto 107
Miami 90
Detroit 93
Cleveland 107
New York 102
Chicago 107
New Orleans 93
Denver 114
Oklahoma City 113
ÞJ
