12:54:12
Vonir Phoenix Suns um sæti i úrslitakeppninni slökknuðu nær algerlega í nótt eftir að þeir töpuðu fyrir Utah Jazz í framlengdum leik, 104-99.
Jazz voru hársbreidd frá því að henda unnum leik frá sér þegar þeir glutruðu niður 21 stigs forskoti í seinni hálfleik. Þeir þurftu magnaða frammistöðu, sérstaklega frá Deron Williams, til að vinna upp sjö stiga mun tveimur mínútum fyrir lok venjulegs leiktíma og voru svo sterkari í framlengingunni þar sem Williams var þeirra besti maður.
Williams endaði með 21 stig og 13 stoðsendingar, Mehmet Okur var með 26 stig og 11 fráköst og Carlos Boozer var með 14 stig og 10 fráköst. Hjá Suns var Steve Nash með 20 stig, Grant Hill með 19 og Shaquille O‘Neal skoraði 16 og tók 10 fráköst.
Nú eru Suns rúmum þremur sigrum á eftir Dallas í áttunda sæti Vesturdeildarinnar og eiga ansi erfiða leið fyrir höndum ætli þeir að skjóta þeim ref fyrir rass.
Á sama tíma í höfuðborginni Washington var Gilbert nokkur Arenas að leika sinn fyrsta leik í vetur fyrir Wizards, en þeir hafa verið án hans meira og minna í tvær leiktíðir þar sem hann hefur glímt við hnémeiðsli.
Arenas átti fínan leik gegn Detroit Pistons þar sem hann skoraði 15 stig og gaf 10 stoðsendingar en klikkaði á ögurstundu þegar skot hans á síðustu andartökum leiksins var varið. Félagi hans, Caron Butler, náði honum á ný en skotið geigaði og Pistons hrósuðu naumum sigri, 96-98.
Hér eru úrslit næturinnar:
Indiana 106
Chicago 112
New York 85
Charlotte 96
Detroit 98
Washington 96
Milwaukee 85
Miami 102
LA Clippers 93
Houston 110
Phoenix 99
Utah 104
Golden State 116
Denver 129
Memphis 66
Portland 86
Mynd/AFP
ÞJ
