17:33
{mosimage}
Fjölnir tryggði sér mjög örugglega Íslandsmeistaratitilinn í drengjaflokki með óvæntum 40 stiga sigri á KR. Fjölnismenn höfðu frumkvæðið allan leikinn og juku smám saman við forskotið. Fjölnismenn sundurspiluðu varnarleik KR með hröðum sóknarleik með Ægir Þór Steinarsson í broddi fylkingar sem skoraði 16 stig í dag, gaf 10 stoðsendingar, hirti 10 fráköst og stal 6 boltum. Stigahæstur Fjölnismanna var þó Arnþór Freyr Guðmundsson með 19 stig en 5 leikmenn Fjölnis skoruðu meira en 10 stig. Hjá KR var Snorri Páll Sigurðsson stigahæstur með 15 stig en næstir voru Baldur Þór Ragnarsson og Örn Sigurðarson með 9 stig hvor.
Fjölnismenn byrjuðu leikinn af miklum krafti, spiluðu hraðan bolta sem KR átti í bullandi vandræðum með. Þegar þrjár mínútur voru liðnar af leikhlutanum voru Fjölnismenn komnir með 6 stiga forskot, 9-3. Um það bil mínútu seinna var forskotið komið upp í 10 stig, 13-3 og tók þá Sigurður Hjörleifsson, þjálfari KR, leikhlé. KR liðið vaknaði aðeins til lífsins eftir það og Örn Sigurðarson skoraði þá 4 stig í röð fyrir KR. Þegar rúmlega þrjár mínútur voru eftir af leikhlutanum var forskot Fjölnis komið niður í 3 stig, 17-14 en þá tók Bjarni Karlsson, þjálfari Fjölnis, leikhlé. Fjölnismenn áttu svo seinustu þrjár mínútur leiksins en þar skoruðu þeir 10 stig gegn 3 stigum KR. Það var þess vegna 10 stiga munur á liðunum þegar flautað var til loka leikhlutans, 27-17. Sóknarleikur Fjölnismanna var til mikilli fyrirmynda og KR var einfaldlega í stökustu vandræðum með að stoppa hraðan leik Fjölnis.
KR tókst að halda stórskyttum Fjölnis í skefjum fyrstu mínútur annars leikhluta en það leið þó ekki á löngu þar til þeir fundu leið framhjá vörn KR. Þegar leikhlutinn var hálfnaður var munurinn á liðunum kominn upp í 18 stig, 37-19. KR skoraði þó 5 stig í röð þangað til Bjarni tók leikhlé fyrir Fjölnismenn, 39-24 og aðeins ein og hálf mínúta var eftir af leikhlutanum. Það var ekkert skorað það sem eftir lifði leikhlutans og var því ennþá 15 stiga munur á liðunum þegar flautað var til hálfleiks, 39-24.
Stigahæstur hjá Fjölni í hálfleik var Tómas Tómasson með 9 stig en næstir voru Arnþór Freyr Guðmundsson með 8 stig og Ægir Þór Steinarsson með 7 stig. Hjá KR var Baldur Þór Ragnarsson stigahæstur með 7 stig en næstir voru Snorri Páll Sigurðsson og Örn Sigurðarson með 6 stig hvor.
{mosimage}
KR byrjaði seinni hálfleik sterkt og skoruðu fyrstu 6 stig þriðja leikhluta. Það dugði þó skammt því Fjölnir svaraði um hæl. Þegar tæplega fjórar mínútur voru liðnar af leikhlutanum var munurinn á liðunum aftur kominn upp í 18 stig, 48-30 og áhlaup KR í upphafi leikhlutans því orðið að engu. Fjölnismenn bættu bara í forskotið eftir því sem leið á leikhlutan með gríðarlega hröðum sóknarleik og baráttu. Þegar þrjár mínútur voru eftir af leikhlutanum tók Sigurður Hjörleifssin leikhlé fyrir KR sem voru komnir 29 stigum undir, 61-32. Eftir það skoruðu KR næstu 5 stig leiksins og spiluðu fínan varnarleik. Munurinn var samt sem áður 26 stig þegar þriðja leikhluta lauk, 63-37.
Fjölnir sýndi algjöra yfirburði sína í leiknum í fjórða leikhluta þegar þeir juku forskotið enn meira. Þegar þrjár mínútur voru liðnar af leikhlutanum höfðu Fjölnismenn náð forskotinu upp í 34 stig, 73-39. Egill Vignisson var hvað líflegastur í liði KR í fjórða leikhluta en hann barðist vel undir körfunni. Það dugði þó lítið því forskot Fjölnis fór aldrei undir 30 stig og þegar yfir lauk höfðu þeir 40 stiga sigur, 88-48.
Umfjöllun: Gísli Ólafsson
Myndir: [email protected]
{mosimage}
{mosimage}
{mosimage}
{mosimage}
