Meistarar LA Lakers máttu sætta sig við tap gegn Dallas Mavericks í öðrum leik sínum í nótt. Á meðan unnu Cleveland sinn fyrsta sigur eftir töp í fyrstu tveimur leikjum vetrarins og Boston vann öruggan sigur á Chicago og hefur unnið alla þrjá leiki sína. Loks má geta þess að Charlotte Bobcats vann New York Knicks í tvíframlengdum spennuleik.
Lakers – Dallas 80-94
Meistarnir áttu afar dapurt kvöld þar sem þeir töpuðu illa á eigin heimavelli. Lokatölurnar gefa ekki alveg rétta mynd af leiknum því að Lakers réttu úr kútnum undir lokin. Sóknarleikur þeirra var í molum þar sem þeir hittu illa og misstu boltann trekk í trekk. Á meðan voru Dirk Nowitzki og félagar hans í góðum gír, en Þjóðverjinn öflugi fór fyrir sínum mönnum ein og oft áður með 21 stigi og 10 fráköstum. Kobe Bryant var með 20 fyrir Lakers, en hitti illa. Andrew Bynum var einna bestur í þeirra röðum, en miðherjinn ungi var með 14 stig og tíu fráköst.
Minnesota – Cleveland 87-104
Cleveland byrjaði leiktíðina með tveimur töpum, en rétti eilítið úr kútnum með sannfærandi sigri á Minnesota í nótt. LeBron James fór auðvitað fyrir Cavaliers með 24 stigum og er sennileg feginn að fá fyrsta sigur leiktíðarinnar í hús. Shaquille O‘Neal lét lítið fyrir sér fara, enda hvíldi hann lengst af leiks. Hjá Minnesota var það nýliðinn efnilegi Jonny Flynn sem var atkvæðamestur með 17 stig.
Boston – Chicago 118-90
Eftir spennandi einvígi liðanna í úrslitakeppnni síðasta vor hafa margir átt von á miklum baráttuleik, en svo fór ekki. Celtics fóru sínu fram og kláruðu leikinn rétt eftir hálfleik. Allen, Pierce og Garnett voru auðvitað í fremstu röð þeirra grænu, en Rajon Rondo átti góðan leik með 16 stoðsendingar og stórskyttan Eddie House fann fjölina sína og skoraði 22 stig.
Boston hafa því unnið fyrstu þrjá leiki sína og virðast til alls líklegir í vetur.
Úrslit næturinnar:
Milwaukee 86
Philadelphia 99
New York 100
Charlotte 102
Washington 89
Atlanta 100
Toronto 107
Memphis 115
Miami 96
Indiana 83
Sacramento 92
New Orleans 97
Chicago 90
Boston 118
Orlando 95
New Jersey 85
Cleveland 104
Minnesota 87
Oklahoma City 91
Detroit 83
LA Clippers 98
Utah 111
Golden State 101
Phoenix 123
Dallas 94
LA Lakers 80
Tölfræði leikjanna
Mynd/AP
ÞJ
