Jón Arnór Stefánsson og liðsfélagar í spænska úrvalsdeildarliðinu CB Granada máttu sjá á eftir dýrmætum stigum í súginn þessa helgina eftir naumt útivallar tap gegn Lagun Aro GBC. Lokatölur í leiknum voru 84-81 heimamönnum í vil. Jón Arnór var stigahæsti maður leiksins með 22 stig á jafn mörgum mínútum.
Jón var einnig með 4 fráköst og eina stoðsendingu í leiknum en hann var með 50% nýtingu í bæði teig- og þriggja stiga skotum sínum og þá setti hann niður öll 6 vítin sín í leiknum.
CB Granada er því í 10. sæti deildarinnar eftir leiki helgarinnar að loknum 32 umferðum á Spáni. Rétt eins og í íslenska boltanum eru 8 efstu lið deildarinnar sem taka þátt í úrslitakeppninni svo Granada á enn von.
