Leikir dagsins: Verða jólin súr eða sæt?

 

Þá er komið að elleftu og síðustu umferðinni í Iceland Express deild karla en heil umferð er á boðstólunum í kvöld þar sem þrír leikir verða í beinni netútsendingu. Allir hefjast leikirnir kl. 19:15 og stórslagir kvöldsins eru Grindavík-Keflavík og Snæfell-KR. Sama hvað raular og tautar eftir leiki kvöldsins eru það samt margfaldir meistarar Snæfells sem verða á toppnum um jólin.

 

Grindavík-Keflavík

Tindastóll-Njarðvík (í beinni á netinu á tindastoll.is)

ÍR-Fjölnir

Snæfell-KR

Stjarnan-Hamar (í beinni á netinu á 210.is)

KFÍ-Haukar (í beinni á netinu á kfi.is)

 

Með sigri í kvöld getur Keflavík jafnað Grindavík að stigum en gulir eru í 2. sæti deildarinnar núna með 16 stig en Keflavík hefur 14 stig í 3. sætinu. Grindavík hefur unnið fjóra heimaleiki í röð en Keflvíkingar hafa unnið síðustu sex deildarviðureignir sínar og má búast við miklum slag í Röstinni í kvöld.

 

Njarðvíkingar hafa verið að vakna til lífsins undanfarið sem og Stólarnir en tvö stig skilja liðin að í deildinni, Njarðvík með 8 í 8. sæti en Tindastóll með 6 í 10. sæti. Stólarnir lágu í Keflavík með naumindum í síðustu umferð en Njarðvíkingar höfðu heimasigur á KFÍ.

 

ÍR er á botni deildarinnar ásamt KFÍ en bæði lið hafa fjögur stig, bæði ÍR og Fjölnir töpuðu í síðustu umferð og freista þess að næla sér í tvö góð stig í þessum síðasta leik þeirra á árinu. Um þessar mundir er Fjölnir í 7. sæti deildarinnar með 8 stiga.

 

Rimmur þessara liða voru frábærar á síðustu leiktíð og ættu ekki að vera nein undantekning að þessu sinni, Snæfell veðrur á toppnum um jólin sama hver úrslit kvöldsins verða en KR á möguleika á því að komast nærri en Vesturbæingar eru í augnablikinu í 4. sæti deildarinnar með 14 stig. Snæfell er á toppnum með 18.

 

Bæði Stjarnan og Hamar hafa tapað síðustu tveimur deildarleikjum sínum svo það mæta hungraði menn inn á parketið í Ásgarði í kvöld. Stjarnan er í 5. sæti deildarinnar með 10 stig en Hamar í því sjötta með jafn mörg stig.

 

Nýliðar KFÍ hafa tapað síðustu sjö deildarleikjum í röð og munu næsta víst ekki selja sig ódýrt í Jakanum í kvöld. Haukar lönduðu sigri í síðustu umferð og eru þessa stundina í 9. sæti með 8 stig.

 

 

 

[email protected]