Andre Dabney hefur leikið sinn síðasta leik fyrir Hamar en forsvarsmenn félagsins hafa ákveðið að láta leikmanninn fara frá félaginu. Ágúst Björgvinsson þjálfari Hamars staðfesti þetta í samtali við Karfan.is nú í kvöld. Dabney hefur verið töluvert frá sínu besta undanfarið og því ættu þessi tíðindi ekki að koma mörgum í opna skjöldu.
,,Eftir frábært tímabil í fyrra voru bundnar vonir við að hann gæti spilað svipað í vetur ef ekki betur en hann hefur verið töluvert frá því og ekki annað hægt en að gera breytingar,” sagði Ágúst. Leit stendur nú yfir að nýjum erlendum leikmanni í Hveragerði og gat Ágúst ekki sagt hvort sá leikmaður yrði kominn í hópinn fyrir næsta deildarleik sem er þann 28. janúar næstkomandi þegar Hamar mætir Keflavík í Toyota-höllinni í Reykjanesbæ.
Mynd/ Dabney kveður Hveragerði.
