Leikir dagsins: Rimman um Reykjanesbæ

Í kvöld hefst 19. umferðin í Iceland Express deild karla með þremur leikjum sem allir hefjast kl. 19:15. Erikifjendurnir Njarðvík og Keflavík mætast í Ljónagryfjunni í rimmunni um Reykjanesbæ, Haukar fá botnlið Vals í heimsókn og KR tekur á móti Tindastól.

KR í 5. sæti deildarinnar með 22 stig en Tindastóll í 7. sæti og geta með sigri komist upp fyrir Snæfell í 6. sæti deildarinnar en Hólmarar leika annað kvöld.

 

Valsmenn eru fallnir í 1. deild en Haukar eiga enn möguleika á því að bjarga sér frá falli með 8 stig í 11. sæti deildarinnar, 6 stigum á eftir Fjölni og ÍR.

 

Keflvíkingar eru í 4. sæti deildarinnar með 24 stig en Njarðvík hefur 16 stig í 8. sæti deildarinnar. Njarðvíkingar bjóða stuðningsmönnum sínum í Grænu ljónunum upp á pizzahlaðborð fyrir leik og einnig munu þjálfarar liðsins fara yfir leikinn og svara spurningum þeirra.