Oklahoma City Thunder urðu í nótt vesturstrandarmeistarar í NBA deildinni með 107-99 sigri gegn San Antonio Spurs. Oklahoma varð með sigrinum aðeins þriðja liðið í sögu NBA til að vinna fjóra leiki í röð í úrslitum austur- og vesturstrandarinnar.
Kevin Durant fór mikinn í liði Oklahoma með 34 stig, 14 fráköst og 5 stoðsendingar. Russell Westbrook bætti við 25 stigum, 8 fráköstum og 5 stoðsendingum.
Tony Parker fór fyrir Spurs með 29 stig og 12 stoðsendingar og Tim Duncan bætti við 25 stigum og 14 fráköstum.
Rúmlega 18.200 manns fylgdust með sínum mönnum í Oklahoma tryggja sér sinn fyrsta farseðil í NBA úrlsitin sem hefjast aðfararnótt miðvikudags í næstu viku á þeirra heimavelli.
Mynd/ AP – Kevin Durant sendir vesturstrandartitilinn á loft.
