Ekkert lát á sigurgöngu Miami

Sjö leikir fóru fram í NBA deildinni í nótt. Meistarar Miami Heat eru hvergi nærri hættir en þeir unnu sinn fimmtánda deildarleik í röð í nótt er liðið lagði Minnesota 81-97 á útivelli.

 

Dwyane Wade fór fyrir Miami með 32 stig, 10 stoðsendingar og 7 fráköst. LeBron James bætti svo við 20 stigum, 10 fráköstum og 4 stoðsendingum. Þá kom Ray Allen með 13 stig af bekknum. Hjá Minnesota var Derrick Williams með 25 stig og 10 fráköst.

 

Miami setti félagsmet með fimmtánda sigrinum í röð en að sama skapi hefði mótspyrnan í Minnesota getað verið meiri þar sem vantaði Kevin Love, Andrei Kirilenko og Nikola Pekovic sökum meiðsla.