Úrslitin hefjast í kvöld – Grillað í Grindavík

Úrslitaviðureignin í Domino´s deild karla hefst í kvöld! Deildarmeistarar Grindavíkur og bikarmeistarar Stjörnunnar mætast í Röstinni kl. 19:15 í sínum fyrsta leik. Vinna þarf þrjá leiki til þess að verða Íslandsmeistari en Grindvíkingar eru ríkjandi meistarar og takist þeim að vinna titilinn verður það í fyrsta sinn síðan árið 2005 sem lið verður meistari tvö ár í röð en Keflavík gerði það síðast þegar þeir urðu reyndar meistarar 2003, 2004 og 2005.

 

Grindvíkingar hafa tvisvar sinnum orðið Íslandsmeistarar, fyrst árið 1996 og aftur á síðustu leiktíð. Stjörnumenn eru á höttunum eftir sínum fyrsta titli en hafa einu sinni leikið til úrslita, tímabilið 2011, og töpuðu þá 3-1 gegn KR.

 

Grindavík 2-0 Skallagrímur

Grindavík 3-1 KR

 

Stjarnan 2-1 Keflavík

Snæfell 1-3 Stjarnan

 

Við þykjumst nokkuð vissir í okkar sök þegar við teflum því fram að byrjunarliðin í úrslitum verði jafnan svona útlítandi:

 

Samuel Zeglinski

Þorleifur Ólafsson

Jóhann Árni Ólafsson

Aaron Broussard

Sigurður Gunnar Þorsteinsson

 

Justin Shouse

Marvin Valdimarsson

Jarrid Frye

Brian Mills

Fannar Freyr Helgason

 

Ef við berum svo saman bekkina hjá liðunum í úrslitakeppninni þá hefur bekkur Stjörnunnar skorað 127 stig í úrslitakeppninni í sjö leikjum liðsins eða 18,14 stig að meðaltali í leik. Hjá Grindavík hefur bekkurinn skorað samtals 78 stig í sex leikjum í úrslitakeppninni eða 13 stig að meðaltali í leik svo það er ljóst að Garðbæingar hafa verið að ná meira út úr sínum bekk en þar hefur Jovan Zdravevski verið að koma sterkur inn í lið Stjörnunnar.

 

Fólk ætti að mæta tímanlega í Röstina í kvöld en um kl. 17:30 verða grillin tendruð í aðstöðunni hjá Láka við Salthúsið en það er KKD Grindavíkur sem sér um söluna á ljúffengum hamborgurum sem fólk getur gætt sér á fyrir stóra slaginn og þá verða fleiri tilboð í gangi fyrir leikgesti. Leikurinn verður svo í beinni útsendingu hjá Stöð 2 Sport, beinni tölfræðilýsingu á kkí.is og að sjálfsögðu mun Karfan.is fylgjast grannt með gangi mála í bæði máli og myndum.