Þór Þorlákshöfn verður að fella sig við fjarveru Grétars Inga Erlendssonar fram að jólum líklega en þann 26. október næstkomandi er Grétar á leið í aðgerð vegna ökklameiðsla.
„Þetta var að koma í ljós núna að þegar ég missteig mig á móti Tindastól í úrslitakeppninni í fyrra braut ég eitthvað bein í ökklanum. þetta bein er laust og strýkst upp við sinar á þessu svæði og er að valda bólgum og verkjum og hef ég því ekkert getað beitt mér hvorki á landsliðsæfingum í sumar né núna á undirbúningstímabilinu. Ég fer í aðgerð núna 26. október og er að vona að ég verði klár í slaginn í lok janúar,“ sagði Grétar í samtali við Karfan.is í dag.
Grétar fékk þessi tíðindi bara í gær og sagði þau áfall: „Ég er ennþá bara að vinna úr þessu, gríðarlegt áfall eftir gengi síðasta tímabils.“
Það þarf svo sem ekkert að fjölyrða um mikilvægi Grétars í herbúðum Þórsara en hann var með 15,2 stig, 6,6 fráköst og tæpa 17 punkta í framlag að meðaltali í leik á síðasta tímabili svo það er stórt skarð sem liðsfélagar hans þurfa að fylla fram að nýja árinu.
