Sautján í röð og Barcelona lagðir að velli!

Uppgjör toppliðanna Valencia og Barcelona fór fram í ACB deildinni á Spáni í dag þar sem Jón Arnór og félagar gerðu það sem fáum tekst, að vinna sigur á heimavelli Barcelona. Lokatölur voru 91-94 Valencia í vil sem eru nú búnir að vinna 17 deildarleiki í röð!

Barcelona tókst að jafna metin 82-82 með þriggja stiga körfu þegar leiktíminn rann út og því varð að framlengja. Valencia stóðst prófið og landaði að lokum 91-94 sigri.

Jón Arnór lék í tæpar 11 mínútur í leiknum en skotin hans vildu ekki niður og því skoraði hann ekki að sinni. Stigahæstur í liði Valencia var Bojan Dubljevic með 16 stig. 

Þar með hefur Valencia opnað nýjan kafla í sögu félagsins með því að vinna 17 deildarleiki í röð, 100% árangur eftir fyrstu umferð deildarinnar. Þetta hefur aðeins verið leikið eftir einu sinni áður í úrvalsdeildinni á Spáni en það gerði Real Madrid tímabilið 2013-2014 þegar liðið vann 27 leiki í röð. Þá lauk þeirri sigurför Real Madrid einmitt með tapi gegn Valencia. 

Svipmyndir úr leiknum

Staðan á Spáni