Þór í Þorlákshöfn hefur ráðið nýtt þjálfarateymi fyrir meistaraflokk karla fyrir komandi tímabil, en greint var frá breytingunum á samfélagsmiðlum félagsins.
Í ljós kom að Ilija Omrčen tekur við sem nýr aðalþjálfari liðsins og honum til aðstoðar verður Hjörtur Sigurður Ragnarsson. Breytingarnar eru liður í áherslum félagsins á frekari uppbyggingu og framtíðarsýn klúbbsins.
Í tilkynningu félagsins kemur fram að stjórn Þórs bindur miklar vonir við komu Ilija Omrčen. Félagið lýsir honum sem þjálfara með mikla þekkingu, reynslu og metnað sem muni hafa jákvæð áhrif á starfsemi klúbbsins og iðkendur. Þá er tekið fram að hann muni ekki aðeins stýra meistaraflokknum heldur einnig taka virkan þátt í almennri uppbyggingu og mótun framtíðarsýnar félagsins. Sjálfur sagðist Ilija heillast strax af þeim hugmyndum sem forráðamenn félagsins kynntu fyrir sér og hann hafi fljótlega fengið mikinn áhuga á að verða hluti af þessu verkefni.
Aðstoðarþjálfarinn Hjörtur Sigurður Ragnarsson bætist einnig í hópinn og lýsir félagið ráðningu hans sem mikilvægu skrefi í þeirri vegferð sem nú er hafin. Stjórnendur Þórs segja að ráðningin endurspegli þann metnað sem einkenni starfsemi félagsins um þessar mundir. Hjörtur segist í yfirlýsingu vera mjög ánægður með að ganga til liðs við Þór og hlakkar til að vinna með Ilija og leikmannahópnum við þau spennandi verkefni sem framundan eru.
