Félagsskapur Molduxa úr Skagafirði lýsir nú eftir fána sínum sem hefur verið týndur um nokkurt skeið. Fáninn var síðast notaður af miklum móð í úrslitakeppninni í Síkinu á síðasta ári, en síðan þá hefur ekkert til hans spurst. Mikill söknuður er í röðum Molduxa enda hefur fáninn fylgt sveitinni í gegnum súrt og sætt á pöllunum og skipar mikilvægan sess í stuðningsmannamenningunni.
Þeir sem kunna að hafa upplýsingar um dvalarstað fánans, eða eru með hann undir höndum, eru vinsamlegast beðnir um að láta vita. Molduxar skora á hvern þann sem veit hvar gripurinn er niðurkominn að skila honum aftur í íþróttahúsið sem fyrst svo hann megi blakta á ný á næstu leikjum. Öll hjálp við að koma fánanum aftur heim er vel þegin.
