Aga- og úrskurðarnefnd körfuknattleikssambandsins hefur birti nýverið röð úrskurða sem sýna að það getur verið dýrt að missa stjórn á skapinu. Alls voru sex einstaklingar sektaðir að þessu sinni, ýmist fyrir einstök atvik í leikjum eða fyrir að safna upp of mörgum tæknivillum á leiktíðinni.
Tveir leikmenn voru sektaðir vegna framkomu sinnar í leikjum sem fóru fram þann 20. mars síðastliðinn. Darryl Latrell Morsell, leikmaður ÍA, og Ryan Benjamin Peters, leikmaður Hamars, þurfa báðir að greiða 15.000 krónur vegna háttsemi sinnar. Morsell var til skoðunar eftir leik ÍA gegn Stjörnunni á meðan atvik Peters átti sér stað í leik Hamars gegn Snæfelli.
Það eru hins vegar tæknivillurnar sem vega þyngst í buddunni hjá mörgum að þessu sinni. Darryl Morsell hjá ÍA kemur aftur við sögu þar, en hann þarf að greiða 20.000 krónur til viðbótar vegna fjögurra tæknivilla sem hann hefur hlotið á tímabilinu. Samtals nemur sektin hans því 35.000 krónum fyrir þennan eina úrskurðarpakka.
Hæstu sektirnar féllu þó í hlut þjálfara deildarinnar. Þeir Daði Berg Grétarsson, þjálfari Hamars, og Viðar Hafsteinsson, þjálfari Hattar, þurfa báðir að greiða 50.000 krónur þar sem þeir hafa báðir safnað átta tæknivillum á tímabilinu. Þá þarf Daníel Andri Halldórsson, þjálfari KR, að greiða 30.000 krónur fyrir að hafa hlotið sex tæknivillur.
Hér má lesa niðurstöður Aga- og úrskurðarnefndar
