Orri Gunnarsson varð fyrir meiðslum á hádegisæfingu íslenska landsliðsins í dag og þurfti að yfirgefa völlinn á sjúkrabörum. Talið er líklegt að um töluvert alvarleg meiðsl sé að ræða, þó endanlegt mat lækna liggi ekki enn fyrir.
Landsliðið var við æfingar í Ásgarði þar sem undirbúningur stendur yfir fyrir tvo mikilvæga leiki gegn Litáen í undankeppni heimsmeistaramótsins. Viðureignirnar fara fram 27. febrúar og 2. mars, annars vegar á heimavelli og hins vegar á útivelli. Atvikið setti skugga á æfinguna og greinilegt var að samherjar og þjálfarateymi höfðu áhyggjur.
Engin snerting virtist eiga sér stað og því bendir flest til þess að hnémeiðslin hafi orðið án áreksturs. Orri gat ekki borið þunga á fætinum og var að lokum fluttur burt af velli.
