Valur lagði heimakonur í Grindavík nokkuð örugglega í kvöld í 17. umferð Bónus deildar kvenna, 66-89.
Eftir leikinn eru liðin jöfn að stigum í 3.-5. sæti deildarinnar með 22 stig líkt og Njarðvík.
Valskonur voru með tögl og haldir í leik kvöldsins frá byrjun til enda. Eftir nokkuð jafnar upphafsmínútur taka þær öll völd á vellinum og eru 14 stigum yfir að fyrsta fjórðung loknum. Við það bæta þær svo fyrir lok fyrri hálfleiksins og eru 21 stigi yfir þegar liðin halda til búningsherbergja í hálfleik.
Bæta lítið við það forskot sitt í seinni hálfleiknum en halda forskoti sínu í kringum 20 stigin út leikinn. Munurinn 19 stig eftir þrjá leikhluta og þær vinna svo að lokum með 23 stigum, 66-89.
Stigahæstar fyrir Val í leiknum voru Alyssa Cerino með 22 stig og Reshawna Stone með 19 stig.
Fyrir heimakonur í Grindavík var stigahæst Abby Beeman með 25 stig og Farhiya Abdi bætti við 14 stigum.
