Njarðvíkingar birtu í dag áskorun á Afrekssjóð og ÍSÍ um að endurskoða og leiðrétta mál KKÍ í ljósi þeirra búsifja sem sambandið varð fyrir í síðustu úthlutun Afreksskjóðs. KKÍ var einnig fært niður um þrep sem afrekssamband úr A-flokki í B-flokk.

Í áskorun Njarðvíkinga segir m.a.: „Körfuknattleiksdeild Njarðvíkur skorar á Afrekssjóð og ÍSÍ að endurskoða og leiðrétta þessi mistök sem gerð voru við úthlutun þessa árs. Þessi aðgerð gerir raunhæfa tilraun Íslands til að komast í fyrsta sinn á HM að engu og veldur óþarfa óvissu til framtíðar. Við óskum þess einnig að íþróttaforystan í landinu taki virkan þátt í að hafa veg íþrótta sem mestan en ekki refsa þeim að óþörfu og fela sig svo á bak við óvandað regluverk sem virðist ekki hafa nokkurn skilning á stærð og umfangi íþróttagreina á heimsvísu.“

Áskorun Njarðvíkinga má lesa í held sinni hér að neðan sem og á heimasíðu þeirra umfn.is:

Körfuknattleiksdeild Njarðvíkur lýsir áhyggjum sínum og vonbrigðum vegna úthlutunar og aðgerða Afrekssjóðs ÍSÍ við færslu KKÍ niður í B-hóp afrekssambanda og lækkunar á úthlutunarfjárhæð vegna þessa.

Síðastliðinn áratug hefur blómaskeið staðið yfir í íslenskum körfuknattleik þar sem A-landslið karla komst í tvígang í lokakeppni Evrópumeistaramótsins og nú þegar þetta er ritað berst Ísland fyrir möguleikum sínum á því að komast á Heimsmeistaramótið sem og sæti á Ólympíuleikunum 2024 í París.

Það er ljóst frá okkar bæjardyrum að Afrekssjóður hefur falið sig á bak við rýrt og óvandað regluverk sem bitnar nú harkalega og með ófyrirséðum afleiðingum á íslenskum körfuknattleik.

Við hjá Körfuknattleiksdeild Njarðvíkur höfum um árabil átt leikmenn í íslenska landsliðinu, atvinnumenn og leikmenn á háskólasamningum í Bandaríkjunum. Við höfum byggt upp öfluga körfuknattleiksdeild og hörmum þá aðför sem íþróttaforystan á Íslandi stundar gagnvart körfuknattleik.

Körfuknattleiksdeild Njarðvíkur skorar á Afrekssjóð og ÍSÍ að endurskoða og leiðrétta þessi mistök sem gerð voru við úthlutun þessa árs. Þessi aðgerð gerir raunhæfa tilraun Íslands til að komast í fyrsta sinn á HM að engu og veldur óþarfa óvissu til framtíðar. Við óskum þess einnig að íþróttaforystan í landinu taki virkan þátt í að hafa veg íþrótta sem mestan en ekki refsa þeim að óþörfu og fela sig svo á bak við óvandað regluverk sem virðist ekki hafa nokkurn skilning á stærð og umfangi íþróttagreina á heimsvísu.

Stjórn Körfuknattleiksdeildar Njarðvíkur