Íslandsmeistarar Vals hafa framlengt samningi sínum við framherjann Hjálmar Stefánsson til næstu tveggja ára.

Hjálmar kom til Vals fyrir nýafstaðið tímabil og var þeim ansi mikilvægur í ferðalagi þeirra að Íslandsmeistaratitlinum, þar sem hann meðal annars var stigahæstur í oddaleik þeirra gegn Tindastól í lokaúrslitunum. Í 33 leikjum fyrir Val á tímabilinu skilaði Hjálmar 8 stigum, 4 fráköstum og stoðsendingu að meðaltali í leik.

Tilkynning:

Kkd Vals tilkynnir með stolti að Hjálmar Stefánsson hefur framlengt samning sinn við Íslandsmeistaranna um tvö ár.
Hjálmar kom til liðsins í febrúar 2021 frá Spáni og hefur fallið einkar vel inní félagið. Hann lék mikilvægt hlutverk í Íslandsmeistaratitlinum á síðustu leiktíð en skemmst er að minnast ótrúlegrar frammistöðu hans í oddaleiknum fræga.
“Mér hefur liðið einkar vel eftir að ég kom í Val. Andinn í liðinu er frábær og náttúrulega ótrúlega gaman að vinna titilinn í fyrra. Ég hlakka til næsta tímabils og vonandi getum við endurtekið leikinn” sagði Hjálmar í stuttu spjalli.