Helstu stuðningsmenn KR körfu, jakkafatagengið svokallaða, hefur ákveðið að ganga til liðs við Val. Þeir sem gengið skipa hafa um 30 ára skeið fylgt KR að málum, en finnst nú kominn tími til að söðla um.

„Okkur finnst við vera komnir að endasstöð. Þar er ekkert launungarmál að okkur finnst sem stjórn KR körfu hafi aldrei metið starf okkar að verðleikum. Sem dæmi má nefna að félagið hefur aldrei boðist til að standa straum af kostnaði við hreinsun á smókingum okkar sem eru orðnir margþvældir eftir að hafa skilað átta titlum í hús, hvað þá að kaupa nýja. Við þurfum að borga okkur inn á leiki, standa í biðröð eftir hamborgurum eins og almennir stuðningsmenn og borga þá í topp. Enginn ferðastyrkur á leiki og engin laun fyrir ábendingar til dómara, sem eru oft vankaðir á KR leikjum eins og allir vita.  Dropinn sem fyllti mælinn er rapptónlist sem spiluð er í tíma og ótíma á leikjum

Þegar Valur hafði samband hugsuðum við okkur ekki lengi um og ákváðum að stökkva á vagninn. Hvað varðar kaup og kjör erum við bundnir trúnaði.“

Heimildarmaður síðunnar hefur fyrir satt að þeim félögum hafi verið boðnir nýir smókingar í Valslitunum,  sérkjör á íbúðum í Valshlíð, frítt á leiki Vals og ótakmarkaðan aðgang að Bláa Lóninu. Við spyrjum hvort þetta sé ástæðan fyrir vistaskiptunum. „Nei, alls ekki. Við sjáum fram á að geta stuðlað að útbreiðslu körfuknattleiksins í Hlíðunum, en þar hafa lágmenningaríþróttir á borð við handbolta og tuðruspark tröllriðið öllu. Áhorfendur þurfa góða leiðsögn í dómgæslu.“

Jakkafatagengið mun frumsýna nýju smókingana í dag kl. 17:00 í beinu streymi á facbooksíðu Vals og kenna Völsurum grunnatriði dómgæslu í körfubolta. Rögnvaldur Hreiðarsson körfuboltadómari og Valsari, sem rekur rakarastofu í Vesturbænum mun  verða þeim félögum til halds og trausts. Hann mun í framtíðinni sjá um hársnyrtingu þeirra félaga í úrslitakeppninni.

Leitað var viðbragða Böðvars Guðjónssonar formanns Körfunattleiksdeildar KR. Hann segir þessi tíðindi koma sér á óvart og hafi valdið honum miklum vonbrigðum. Mikil eftirsjá sé af þeim félögum, en varðandi ástæður uppsagnarinnar, segir hann þar vera tvær hliðar. Smókingar þeirra hafa fært félaginu þvílíka gæfu, að stjórninni fannst óþarfa áhætta tekin með að þrífa þá og hvað þá kaupa nýja. Hann óskar þeim gæfu og gengis hjá Val og segir þá alltaf velkomna í KR á ný. Varðandi rapptónlistina, telur hann þann punkt eiga við rök að styðjast, en getur þess að hún hafi verið spiluð að ósk leikmanna sem eru farnir að spila með Val og telur hann því að ekki taki betra við hjá þeim félögum hinumegin við flugvöllinn.