Fyrir leik KR og Vals í kvöld í DHL Höllinni mun Högni Egilsson fyrrum körfuboltamaður úr Val og tónlistarmaður leika 1-2 lög og segja nokkur orð um tjáningarfrelsið. Hér fyrir neðan má lesa allt um viðburðinn, en hann er skipulagður af Íslandsdeild Amnesty International.

Þá munu bæði lið leika í sokkum sem deildin er með til sölu til styrktar mannréttindum, en þeir eru hannaðir af Bergi Guðnasyni.

Hér má sjá bræðurna Matthías og Jakob í sokkunum

Fréttatilkynning:

Íslandsdeild Amnesty International vekur athygli á viðburði sem fer fram í kvöld fimmtudag, 11. mars, kl. 20.15 á leik KR og Vals í Dominosdeild karla í körfubolta í DHL höllinni. Búist er við miklum hitaleik og vill Íslandsdeildin nýta tækifærið til að vekja athygli á mikilvægi mannréttinda með áherslu á tjáningarfrelsið.

Högni Egilsson, fyrrum körfuboltakappi Vals sem er betur þekktur fyrir tónlist sína, tekur 1-2 lög í upphafi leiks og segir nokkur orð um tjáningarfrelsið.

Bæði lið ætla að klæðast sokkum sem Amnesty selur til styrktar mannréttindastarfsins. Sokkarnir eru hannaðir af Bergi Guðnasyni og á þeim stendur „Hvað eru mannréttindi?“. Íslandsdeild Amnesty International vill einmitt vekja athygli á því með þessum viðburði að það eitt að tjá skoðanir sínar eru mannréttindi sem eru varin í alþjóðalögum.

Aðgerðasinnar frá Háskólafélagi Amnesty International munu því safna undirskriftum fyrir mál Pablo Hasél, spænska rapparans sem nýlega var dæmdur í 9 mánaða fangelsi fyrir „vegsömun“ hryðjuverka sem og „róg og níð gegn krúnunni og stjórnkerfi“ landsins. Dómurinn var byggður á færslum á Twitter og texta í rapplagi. Hann er dæmdur fyrir það eitt að nýta tján­ing­ar­frelsið sitt.

Pablo er ekki sá eini sem hefur hlotið slík örlög þar í landi. Ákvæði um refsingu fyrir vegsömun hryðjuverka, róg og níð gegn krúnunni og ríkisstofnunum eða fyrir að misbjóða trú í hegningarlögum eru svo víðfeðm að spænskir borgarar eiga á hættu saksókn fyrir lögmæta tjáningu.

Undirskriftirnar verða svo sendar á Amnesty International á Spáni sem afhendir stjórnvöldum þar í landi bréf um kröfur og undirskriftarlista.

Amnesty International krefst þess að stjórnvöld á Spáni:

1) Afnemi þessi ákvæði úr hegn­ing­ar­lögum.

2) Felli niður allar ákærur sem eru byggðar á ákvæði 578 og leysi alla einstaklinga úr haldi sem hafa verið fangelsaðir á grundvelli þess fyrir að nýta rétt sinn til tjáningar með friðsömum hætti.

Hér má finna frekari upplýsingar:

Um mál Pablo Hasél

Um tjáningarfrelsið á Spáni

Um Amnesty sokkana