ÍR hefur framlengt samningi sínum við Ísak Mána Wíum um yfirþjálfun yngri flokka, en ísak er einnig þjálfari fyrstu deildar kvenna liðs félagsins. Tilkynningu félagsins má lesa hér fyrir neðan, en í henni er tekið fram að Ísak hafi upphaflega tekið við starfinu fyrir síðasta tímabil og að uppgangur í yngri flokkum félagsins hafi verið mikill á síðustu árum.

Fréttatilkynning:

Körfuknattleiksdeild ÍR hefur gengið frá áframhaldandi samningi við Ísak Wíum um að gegna stöðu yfirþjálfara yngri flokka.

Samningurinn mun gilda næstu þrjú keppnistímabil eða út tímabilið 2023-2024.

Ísak tók við stöðunni fyrir síðasta tímabil og hóf hann þá að stýra stefnumótun fyrir yngri flokka starf deildarinnar. Ísak er jafnframt á sínu fyrsta ári sem þjálfari meistaraflokks kvenna, sem er í toppbaráttu 1. deildar og er liðið að gera harða atlögu að sæti í Dominos deildinni á næsta tímabili.

Undanfarin tvö ár hefur hann sömuleiðis starfað hjá KKÍ sem aðstoðarþjálfari U15 landsliðs karla. Mikill uppgangur hefur verið í yngri flokka starfi félagsins undanfarin ár og fjöldi iðkenda sjaldan verið jafn mikill. Samningurinn við Ísak er mikilvægt skref í áframhaldandi uppbyggingu og er mikil tilhlökkun fyrir komandi árum.