Landslið Íslands sem heldur til Slóvakíu í lok mánaðar í undankeppni HM 2023 var tilkynnt nú fyrir hádegið. Athygli vekur að Kristófer Acox er ekki í leikmannahóp Íslands, en hann er samkvæmt fréttatilkynningu KKÍ meiddur.

Samkvæmt þjálfara Stjörnunnar og fyrrum aðstoðarþjálfara Íslands, Arnari Guðjónssyni, mun Kristófer hafa meiðst aftan í læri við æfingar á frjálsíþróttavelli, en líkt og Arnar tekur fram er það staður sem landsliðsmaðurinn og tvöfaldur verðmætasti leikmaður Dominos deildarinnar er ekki vanur að æfa á og því má leiða líkur að því að það sé ástæða meiðslana.

Mikil pressa hefur verið sett á yfirvöld undanfarna daga frá þjálfurum landsins um að leyfa á ný afreksfólki að æfa, en samkvæmt þeim reglum sem taka gildi á morgun er þeim ennþá meinuð aðganga að vinnustað sínum, íþróttahúsinu.