Líkt og greint var frá í gær var leikmaður Njarðvíkur í Dominos deild karla, Zvonko Buljan, dæmdur í þriggja leikja bann fyrir háttsemi sína í leik fyrstu umferðar gegn KR. Stjórn Njarðvíkur hefur í kjölfarið sent frá sér yfirlýsingu, þar sem að kemur fram að hún telji bannið fara umtalsvert úr hófi.

Yfirlýsinguna er í heild hægt að lesa hér fyrir neðan, en í henni bendir stjórn Njarðvíkur meðal annars á að hún hafi upphaflega ekki mótmælt því að aga- og úrskurðanefnd fjallaði um háttsemi Buljan í umræddum leik, en dragi þó eftirá í efa að hægt sé að setja háttsemina í sama flokk og nefndin geri með dóm sínum.

Yfirlýsing Njarðvíkur:

Eins og fram hefur komið var Zvonko Buljan leikmaður Njarðvíkur í dag dæmdur í þriggja leikja bann af aga- og úrskurðarnefnd KKÍ. Niðurstaða nefndarinnar er stjórn KKD UMFN mikil vonbrigði.

Stjórn KKD UMFN mótmælti ekki kærunni til aga- og úrskurðarnefndar þegar hún var upphaflega send til félagsins enda áttu gjörðir Buljan sem hann er dæmdur fyrir ekkert erindi við körfuknattleik. Njarðvík harmar þessa hegðun leikmannsins og verður tekið á málinu innanbúðar með viðeigandi hætti.

Það er einróma mat stjórnar KKD UMFN að í þessu máli hafi aga- og úrskurðarnefnd farið umtalsvert úr hófi fram við dómskvaðningu sína. Að vísa til reglugerðar um líkamsmeiðingar eða tilrauna til slíks, þegar myndbandsupptakan sýnir glögglega að þarna var á ferðinni óviðeigandi hegðun og tilraun til ögrunar án líkamsmeiðinga, er óhóf af hálfu aga- og úrskurðarnefndar.

Síðustu sex ár hafa sex leikmenn á Íslandi verið dæmdir í þriggja leikja bann eða meira. Ástæður hafa verið m.a. „hættuleg framkoma gagnvart dómurum leiksins.“ – „Sérlega grófur leikur eða ofbeldi.“ – „Alvarlega grófur leikur.“

Myndbandið sem farið var vel yfir í Körfuboltakvöldi sýnir að sú var ekki raunin í viðureign KR og Njarðvíkur þann 3. október og því vill stjórn KKD UMFN hvetja stjórn KKÍ sem og aga- og úrskurðarnefnd til þess að endurskoða niðurstöðu sína í málinu.

Stjórn KKD UMFN