Deildarmeistarar Vals halda áfram að bæta við sig fyrir komandi átök í Dominos deild kvenna. Ásta Júlía Grímsdóttir snýr aftur eftir ársveru í Bandaríkjunum. Í tilkynningu Vals segir:

Ásta Júlía Grímsdóttir gerði í dag tveggja ára samning við körfuknattleiksdeild Vals. Ásta Júlía hefur undanfarið ár leikið með Houston Baptist University í Texas en var þar áður tvö tímabil í Val og varð m.a. bikar- og Íslandsmeistari með liðinu tímabilið 2018-2019. Ásta Júlía hefur leikið með öllum yngri landsliðum Íslands og var á dögunum valin í æfingahóp A-landsliðsins. Eins og fram hefur komið hefur Ásta Júlía verið í háskólaboltanum í Texas en vegna breyttra aðstæðna tók hún ákvörðun um að snúa aftur í Val.

Völsurum er spáð Íslandsmeistaratitlinum af flestum en liðið vermir 1. sætið í bæði spá Körfunnar og forráðamanna deildarinnar. Koma Ástu Júlíu til Vals ætti ekki að draga úr væntingum til liðsins.