Öllum verkefnum yngri landsliða hefur verið aflýst. Er þar um að ræða bæði Evrópu og Norðurlandamót sem fara áttu fram í sumar.

Tilkynningu KKÍ er hægt að lesa í heild hér fyrir neðan.

Tilkynning frá FIBA: Engin sumarmót yngri landsliða 2020

Stjórn FIBA Europe hélt stjórnarfund í gær og tók fyrir málefni er varða stöðuna í heiminum í dag og með framhaldið í sumar í mótahaldi sínu.

Stjórn FIBA Europe tilkynnti nú formlega rétt í þessu að hún hefði ákveðið að engin mót yngri landsliða fari fram í sumar á þeirra vegum. Það þýðir að Evrópukeppnir U16, U18 og U20 liða fara ekki fram árið 2020 í öllum deildum. Alls er um 16 mót að ræða á þeirra vegum víðsvegar um Evrópu.

Mikilvægast er að setja áfram heilsuna í forgang og reyna allt til að stoppa útbreiðslu veirunnar sem nú herjar á heiminn. Staðan er víða slæm og ennþá margt óljóst hvenær körfuknattleiksæfingar geta hafist að nýju og hvað þá mannamót og einnig hver staðan verður þá í Evrópu allri til ferðalaga og dvalar erlendis. Því tók FIBA þessa ákvörðun í gær.

Stjórn og starfsfólk KKÍ mun skoða á næstu misserum áfram hvort eitthvað annað afreksstarf en keppni á mótum erlendis fari fram þegar það verður leyfilegt og gerlegt síðar í sumar.

Þá ákváðu norðurlöndin saman að ekkert yrði af NM-móti landanna í Finnlandi hjá U16 og U18 liðunum og nú þegar hefur verið hætt við verkefni U15 liðanna í Danmörku í júní en tilkynning barst til KKÍ þess efnis í gær.