Grindvíkingar hafa samið við Litháann Valdas Vasylius sem er 203 cm hár miðherji og lék síðast með BC Šilutė í næst efstu deild í heimalandi sínu. Í fjórum leikjum með liðinu í vetur var hann með 17,8 stig og 8,3 fráköst að meðaltali í leik.
Valdas, sem er fæddur 1983, lék með liði Neptunas Klaipeda í EuroLeague tímabilið 2014-2015 þar sem hann var með 6,8 stig að meðaltali í leik í 10 leikjum. Auk heimalandsins þá hefur Valdas spilað sem atvinnumaður í Grikklandi, Póllandi, Rússlandi og Úkraínu.
Áður en atvinnumannaferillinn hófst stundaði hann nám í mennta- og háskóla í Bandaríkjunum en hann lék með Old Dominion háskólanum á árunum 2003 til 2007.
Næsti leikur Grindavíkur í Domino’s deildinni er úti á móti Haukum næstkomandi fimmtudag.
