Samantekt – Dagur 1: Einn frábær sigur!

Myndasöfn, viðtöl og umfjallanir

Skrifað af

28/06/2018

Fyrsta degi á Norðurlandamóti yngri landsliða er lokið. Fyrstu andstæðingar Íslands voru Finnar sem mæta iðulega með ógnarsterk lið og því ljóst að framundan væri erfiður dagur. Öll liðin spila gegn hvort öðru á sama degi, þannig U16 og U18 liðin mættu öll Finnlandi í dag.

Uppskeran betri nú en fyrir ári síðan eða einn sigur í fjórum leikjum. Kvennaliðin mættu einfaldlega ofjörlum sínum í dag, liðin voru sterkari á vellinum í dag en Íslensku liðin geta tekin mikinn lærdóm úr þeim leikjum. Finnsku kvenna liðin eru gríðarlega vel þjálfuð og með mjög sterka leikmenn í liðinu.

U16 karla vann gríðarlega frækinn sigur á Finnlandi þar sem allir tólf leikmenn liðsins lögðu eitthvað í púkk. Liðið þurfti að hafa mikið fyrir þessum sigri en leikurinn var stórfurðulegur þar sem bæði lið töpuðu samanlagt 68 boltum í leiknum. U18 lið karla tapaði svo naumlega í leik sem hefði auðveldlega geta fallið með þeim á öðrum degi.

Andstæðingar morgundagsins eru Eistar. Rétt eins og í fyrra er stefnan sett á að leika sér að eistunum enda vann Ísland þrjá af fjórum leikjum sínum gegn Eistlandi fyrir ári síðan.

Opna Karfan.is mótið í Frisígólfi fer einnig fram hér í Kisakallio svæðinu um helgina. Þar keppast ritstjórar Karfan.is um þennan eftirsótta titil. Staðan eftir tvo hringi er sú að Davíð Eldur hefur tvo sigra en Ólafur Þór hefur ekki unnið hring. Við fylgjumst áfram spennt með framvindu mála.

Minnum á Karfan.is er virkt á Instagram.