Ragnar Ágúst Nathanaelsson hefur skrifað undir samning við Val að leika með liðinu í Dominos deild karla að ári. Raggi lék með Njarðvík á síðasta tímabili en var látinn fara að tímabilinu loknu. Hann hefur leikið með Þór Þ, Hamri og á spáni til að mynda. Þetta kemur fram í tilkynningu frá Val í morgun. 

 

Raggi var með 8 stig og 8 fráköst fyrir Njarðvík að meðaltali í leik á síðasta tímabili. Njarðvík komst í átta liða úrslit en féll úr leik gegn KR 3-0 í því einvígi. 

 

Í tilkynningu frá Val segir: 

 

Ragnar lék síðasta tímabil með Njarðvíkingum en tímabilið 2016 til 2017 lék Ragnar með spænsku liðunum Arcos Albacete Basket og Cáceres Ciudad del Baloncesto. Ragnar hóf feril sinn hjá Hamri en þar var einmitt þjálfari Ágúst Björgvinsson sem er núverandi þjálfari Vals. Ragnar lék undir handleiðslu Ágústs í 4 ár. Ragnar hefur auk þess leikið með liðum Þórs Þorlákshöfn og Sundsvall Dragonsí Svíþjóð. Ragnar á að baki 38 leiki með A-landsliði Íslands og var í leikmannahópnum á Evrópumótinu í Berlín haustið 2015. 

 

Ágúst um Ragnar: “Ragnar er frábær viðbót við góðan og skemmtilegan hóp sem við erum búnir að byggja upp síðustu tímabil. Það verður spennandi fyrir mig að vera aftur með Ragga í liðinu mínu en við náðum virkilega vel saman þegar hann lék undir minni stjórn hjá Hamri á árunum 2007 til 2011. Þá steig hann sín fyrstu skref í úrvalsdeildinni.” 

 

Ragnar: “Ég er mjög spenntur að vera kominn í Val. Það eru spennandi tímar framundan og það verður gaman að taka þátt í þeirri uppbyggingu sem er að eiga sér stað á Hlíðarenda þessi misserin. Það eru hörku leikmenn í þessu liði og ég hlakka til að æfa með þeim og komast í takt með þeim. Það verður gott að hafa Gústa á hliðarlínunni hann þekkir mig mjög vel og það er mörgu leyti honum að þakka að ég spila körfubolta í dag. Ágúst getur hjálpað mér að spila aftur körfubolta af heilum hug. Heilt yfir er ég viss um að ég eigi eftir að hjálpa liðinu og við komum til með að vera erfiðir andstæðingar fyrir liðin í deildinni.”