Tindastóll tók á móti Haukum í skemmtilegum leik í Dominos deild karla í Síkinu í kvöld.  Hvorugt liðið hafði byrjað mótið vel en Stólar voru á uppleið og höfðu unnið gríðarlega sterkan sigur í Grindavík í síðustu umferð.  Haukar sýndu þó strax frá byrjun að þeir ætluðu að selja sig dýrt og komust í 12-2 með þrist frá Kára Jóns þegar rétt rúmar 2 mínútur voru liðnar af leiknum. 

 

Heimamenn jöfnuðu í 14-14 með þrist frá Pétri Rúnari og voru svo komnir 5 stigum yfir þegar fyrsta leikhluta lauk með tveimur frábærum þristum frá Hannesi Inga sem átti frábæra innkomu.  Þessar sveiflur áttu síðan eftir að halda áfram út leikinn en Haukar voru 8 stigum yfir í hálfleik eftir 15-0 kafla! 

 

Heimamenn þurftu svar og það kom heldur betur því þeir unnu þriðja leikhlutann 29-13!  Sóknin gekk smurt og vörnin var gríðarlega hreyfanleg.  Haukarnir svöruðu þessu með því að skora fyrstu 8 stig lokaleikhlutans og jafna 63-63 en heimamenn voru sterkari á lokakaflanum og lönduðu sigri.
 

Þáttaskil

Í stöðunni 73-73 setti Arnar Björns risaþrist og í næstu sókn Hauka meiddist Kári Jónsson og þegar tvær og hálf mínúta eru eftir í jöfnum leik þá munar um minna.  Kári hafði þó ekki verið að gera mjög mikið fram að því.  Arnar sigldi sigrinum heim fyrir heimamenn og setti 6 víti í röð á lokamínútunni auk þess að taka sóknarfrákast og stela boltanum tvisvar.

 

Hetjan

Arnar Björnsson er maður leiksins fyrir frábæran varnarleik, fyrir að setja 26 stig, fyrir 100% vítanýtingu (10/10) og síðast en ekki síst fyrir þessa rosalegu lokamínútu sem áður er getið.  Caird og Hester voru líka að skila góðum tölum og vert er að minnast á drifkraftinn sem býr í Helga Rafni fyrirliða liðsins sem reif félaga sína áfram, sérstaklega í seinni hálfleik.

 

Kjarninn

Heimamenn í Tindastól toppuðu á réttum tíma í sveiflukenndum leik.

 

Tölfræðin lýgur ekki

Hvergi mikill munur nema að Haukar töpuðu boltanum tvöfalt oftar en Tindastóll.  Og það er talsverður munur
 

Tölfræði leiks

Myndasafn

 

Umfjöllun, myndir / Hjalti Árna

 

Mynd: Israel Martin og Chris Caird fagna sigrinum