Ísland tapaði fyrir Tékklandi, 89-69, í fyrsta leik undankeppni heimsmeistaramótsins fyrr í kvöld í Tipsport Arena í Pardubice. Næst leikur liðið komandi mánudag heima í Laugardalshöllinni gegn liði Búlgaríu, en þeir unnu sinn fyrsta leik í riðlinum í kvöld gegn Finnlandi.
Byrjunarlið Íslands: Martin Hermannsson, Logi Gunnarsson, Jakob Sigurðrson, Haukur Helgi Pálsson & Hlynur Bæringsson
Gangur leiks
Í upphafi leiks leit íslenska liðið nokkuð vel út. Spiluðu virkilega góðan varnarleik, en voru þó litlu skrefi frá heimamönnum þegar að fyrsti leikhluti var á enda, 15-11.
Undir lok fyrri hálfleiksins bætti Tékkland aðeins í, en þegar að liðin héldu til búningsherbergja í hálfleik var munur þeirra kominn í 9 stig, 39-30.
Atkvæðamestir fyrir Ísland í fyrri hálfleiknum voru þeir Martin Hermannsson með 12 stig og Kristófer Acox með 6 stig og 6 fráköst.
Í upphafi seinni hálfleiksins ná heimamenn að halda í forystu sína. Þegar að þriðji leikhlutinn endaði var munurinn enn 9 stig, 60-51.
Í byrjun fjórða leikhlutans hristi Tékkland lið Íslands svo af sér. Þegar að 5 mínútur voru búnar af hlutanum var munurinn kominn í 18 stig, 74-56. Undir lok leiksins ná þeir svo að halda þessari forystu og fara að lokum með 20 stiga sigur af hólmi, 89-69.
Kjarninn
Alltof mikið álag var á þeim leikmönnum sem voru að gera vel fyrir Ísland í dag samanborið við það framlag sem heimamenn fengu frá sínu liði. Vörn íslenska liðsins hélt í upphafi, en alltof margir slakir kaflar þeim megin á vellinum hjá þeim urðu þeim að falli. Leikurinn var þó spennandi allt fram til byrjunar fjórða leikhluta. Maður hafði það á tilfinningunni að Ísland ætti inni í þessu óþarflega stóra tapi.
Tölfræðin lýgur ekki
Skotnýting íslenska liðsins var jafn slæm úr djúpinu (4/24) og hún var góð af vítalínunni (23/24). Ef bara fleiri skot fyrir utan hefðu dottið fyrir Ísland, þá er aldrei að vita hvernig þessi leikur hefði farið.
Gekk ekki heill til skógar
Haukur Helgi Pálsson meiddist á öxl snemma í leiknum og náði lítið að beita sér. Stigalaus á þeim 27 mínútum sem hann þó spilaði, en líklegt er að meiðslin hafi haft þau áhrif.
Skoraði í sinni fyrstu sókn
Tómas Þórður Hilmarsson lék sinn fyrsta A landsliðsleik í kvöld. Kom inn á þegar að mínúta var eftir af leiknum og náði að setja körfu í sinni fyrstu sókn með liðinu.
Jákvætt
Bæði áttu Kristófer Acox og Kári Jónsson fínan leik fyrir Ísland í dag. Maður sér ekki fyrir sér að neitt annað en stórvægileg meiðsl komi í veg fyrir að þeir tveir, ásamt að sjálfsögðu Martin, verði einir af burðarásum þessa liðs í framtíðinni.
Hetjan
Martin Hermannsson var frábær fyrir Ísland í kvöld. Skoraði 29 stig, tók 2 fráköst, gaf 2 stoðsendingar og stal 2 boltum á þeim 37 mínútum sem hann spilaði. Kom sér í 15 skipti á vítalínuna og setti öll skotin niður.
Umfjöllun, myndir, viðtöl / Davíð Eldur
Viðtöl:
