Framherji Keflavíkur, Magnús Már Trustason, hefur undirritað nýjan tveggja ára samning við félagið samkvæmt fréttatilkynningu frá þeim. Magnús, sem vaxið hefur gríðarlega á síðustu tveimur árum með félaginu, skilaði 13 stigum og 4 fráköstum að meðaltali í þeim 30 leikjum sem hann lék á síðasta tímabili. Það sem kannski þær tölur segja ekki er hversu skilvirkur leikmaður Magnús er, en í þessum 13 stigum er hann að skjóta 58% úr tveggja stiga skotum, 40% úr þriggja stiga skotum og er með 77% vítanýtingu.

 

Það er einnig staðfest í tilkynningunni að allir íslenskir leikmenn liðsins sem léku með þeim á síðasta tímabili verði með þeim aftur á því næsta. Þá höfðu þeir einnig bætt við sig Þresti Leó Jóhannssyni frá Þór á Akureyri fyrir nokkrum vikum.