Skallagrímur sigraði Grindavík, 83-67, í 17. umferð Dominos deildar kvenna í Mustad Höllinni í Grindavík. Eftir leikinn eru liðin bæði í sama sæti og áður. Skallagrímur í 1.-2. sætinu ásamt Keflavík, en Grindavík í því 8.
Vandræðin
Mikið hefur gengið á hjá Grindavík síðustu vikur og mánuði. Mikið af meiðslum hjá lykilleikmönnum, skiptingar og veikindi í þjálfarateyminu sem og núna síðast eiga þær í mestum vandræðum með að ná að skrá, Angela Rodriguez, nýjan erlendan leikmann sinn til leiks, en hún hefur verið á landinu á þriðju viku.
Útlendingurinn okkar að missa af fjórða leiknum í kvöld, næstum tvær vikur síðan hún kom til landsins. Takk Útlendingastofnun _x1f611_#korfubolti
— Lovísa (@LovisaFals) January 25, 2017
Kjarninn
Skallagrímur gerði það sem þær þurftu í þessum leik. Ekkert meira. Grindavík tók nokkrar rispur í leiknum, í byrjun leiks, sem og í byrjun lokafjórðungsins, en þær hafa líklega ekki gert neinn stuðningsmann Skallagríms neitt sérstaklega taugaveiklaðan.
Vendipunkturinn
Skallagrímur var aðeins 10 stigum á undan heimastúlkum í hálfleik, 42-32. Munur sem að Grindavík hefði vel getað unnið niður í seinni hálfleiknum. Það gerðist þó ekki. Leikmenn Skallagríms mættu miklu mun betur stemmdari inn í seinni hálfleikinn. Spiluðu á þessum kafla hreint stórkostlega vörn. Byrja fyrstu 5 mínútur hlutans á 12-3 áhlaupi. Leik lokið.
Tölfræðin lýgur ekki
Skallagrímur tók 31 sóknarfrákast (66 í heildina) gegna aðeins 7 sóknarfráköstum (40 í heildina) Grindavíkur. Leyfi mér að fullyrða að ekkert lið tapi/vinni leik með slíka tölfræði.
Maður leiksins
Tavelyn Tillman átti flottan leik fyrir Skallagrím í kvöld. Skoraði 27 stig, tók 3 fráköst og gaf 6 stoðsendingar á aðeins 31 mínútu spilaðri.
Umfjöllun / Davíð Eldur
